الأربعاء، 5 أغسطس 2009

محمد زين الاسطوره " هادم الاساطير "


محمد زين أفتكروا الاسم ده كويس قوي محمد زين هو الطفل المعجزه اللي قدر يهدم بمفرده كل الاساطير اللي كنت عايش عليها وهو لسه سنه 6 سنين الحكايه وما فيها ان زمان ايام الجامعه كنت متاثر بفكر التنميه البشريه وان لازم نساعد بعض ونرد الدين للمجتمع ( والله رديته من زمان) وقلت ان اول حاجه لازم اعملها هي أن اساهم في تعليم أبناء المنطقه اللي انا ساكن فيها بالمجان وبدات التجربه علي الاسطوره محمد زين . محمد زين في سنه اولي ابتدائي بس زكاءوه ممكن ياهله يرجع بطن امه تاني وكنت مصدق أن المرحله الابتدائيه اهم مرحله في حياتي الانسان وان المدرسين لازم يكونوا دارسين علم نفس لان اي حاجه بتأثر في الطفل ويبقي المدرس عارف سيكولوجيه التربيه .محمد زين كان فيه شبه كبير من فلافيو هداف الاهلي قبل ميبئا الهداف ويروح يعمل عمل في احراش افريقيا ويبئا الهداف ( تصور فلافيو وهو طفل بيلعب بالباس البفته تلتقي محمد زين ناطط في وشك )

بدا بدرس اللغه العربيه فاكر الدرس ده كويس جدا كان نشيد اسمه " قطتي "

قطتي صغيره ... اسمها نميره

لعبها يسلي ... وهي لي كظلي

ها يامحمد ياحبيبي احنا المفروض نحفظ الدرس ده قعدت حوالي 3 اشهر في النشيد وكل يوم اجي اسمع لمحمد الاقيه ناسي وابدا من جديد . كانوا زمان بيقولوا ان الفلاسفه لازم يدروسوا للاطفال مثلا جان جاك روسو سارتر غاندي فرويد او علي الاقل اوباما عشان يفهم بالهداوه محمد هدملي الاسطوره ده بمنتهي السهوله وخلاني اطالب للتلاميذ في الابتدئي بهتلر موسوليني فرانكو شارون هولاكو او علي اقل تقدير جبار بتاع فيلم اميتاب تشان بتاع التمساح الهندي . يابني سمع النص . يعني ايه نص .قصدي النشيد . حاضر .

قطتي نميره اسمها قصيره . محمد زين أثبت بالدليل القاطع فشل كل نظريات داروين وان الانسان كان اصله قرد وطلع انا الانسان اصله كنبه . محمد زين ياحضرات اثبتلي ان الحروف الابجديه بتنتهي عند حرف ال ( ج) . واكتشفت أن محمد زين ميعرفش الحروف وابتدات من الاول وقعد احفظه في الحروف لغايه ما وصلت لحرف السين ( س) وخلاني اصدق ان ده اخر حرف في الابجديه. محمد زين ياحضرات في مره من لحظات التجلي اللي هي كتير في حياته قالي عايز درس حساب عشان اوصل معاه لرقم عشره قعدت شهر ( تخيلوا اني حفظته جدول الضرب لغايه 2*7) . الغريب أن محمد زين كان حاله طبيه نادره جدا أول طفل في التاريخ يصاب بالزهايمر وفقدان زاكره مزمن في نفس الوقت اجي تاني يوم اسمعله الاقيه ناسي ( كنت بحمد ربنا أنه لسه فاكرني انا) . محمد زين ياحضرات اول طفل في العالم يطلع الدغ في الطاء وينطقه مابين الكاف والقاف يعني مثلا ( اطلع بره ) ينتطقها اكقلع بره ( طيب ) ينطقها كيب (طايره) ينطقها كايره وفضلت علي الحال ده 6 اشهر عربي حساب حساب عربس عربي حساب ودوخيني يالمونه لغايه ما وصلنا في الاخر أنه حفظ نشيد قطتي جدول الضرب لغايه 2* 10 حسيت اني قدرت اعمل حاجه لبلدي زي احمد السقا في فيلم مافيا وقررت اجمع شويه اطفال واديهم درس. وفي اخر يوم قررت اعمل امتحان مفاجئ لمحمد ( مبلغه بالامتحان قبله ب3 ايام ) وجت الحظه الفارقه بساله مع نشيد قطتي كالعاده لاقيته ساكت وبيفكر ( مكنتش محفظه غير النشيد ) قولتله خلاص ولا يهمك قولي 2*5 بكام بعد دقيقه لقيته بيقولي قطتي صغيره واسمها نميره يااااااااالهوووووووووووووي .... سلام

هناك 6 تعليقات:

  1. هههههههههههههه بجد ضحكتني

    ردحذف
  2. هههههههه فكرتنى بايام ما كنت بدرس للعيال التحف اللى زى محمد زين الغباء بقى سمة فى المجتمع المصرى كله :))

    ردحذف
  3. هههههههههههههههه ...... يخرب بيت عقلك يا نادر ..... و ايه يابنى اللى يخليك تعمل كده من الاول .... ال حق البلد ال .... ملعون ابو .... ولا بلاش .... خلينا نعمل بأصلنا
    بس ازاى محمد زين ده يفوت عليا و ماتقوليش عليه .... حسابنا لما ارجعلك

    ردحذف
  4. شركة المثالية للتنظيف تسعد بتقديم خدماتها لعملائها بالمنطقة الشرقية خدمات تنظيف خدمات مكافحة حشرات خدمات تسليك مجاري المياه للمطابخ والحمامات جميع الخدمات المنزلية تجدونها مع شركة المثالية للتنظيف بافضل جودة وارخص الاسعار بالاعتماد علي كافة الادوات الحديثة والعمالة الماهرة

    شركة المثالية للتنظيف
    شركة المثالية للتنظيف بالدمام
    شركة المثالية للتنظيف بالخبر

    ردحذف